әл-Фараби атындағы Қазақ ұлттық университетінің журналистика факультетінде «Баспасөз және электронды БАҚ» кафедрасының доценті Жидегүл Әбдіжәділқызы 1-курс магистранттарымен бірге «Конвергентті журналистика» тақырыбында ашық сабақ өткізді.  Дәріске факультеттің бірнеше ұстазы қатысты.

Ашық сабақ барысында Жидегүл Әбдіжәділқызы «Конвергентті журналистика» тақырыбында дайындаған слайдты көрсетіп, тақырыпқа егжей-тегжейлі шолу жасады. Ал, магистранттар әмбебап журналистің сөмкесінде не болу керектігін түсіндіріп, мультимедиалық тілшілердің негізгі міндеттеріне тоқталды. 1-курс магистранты Ақбота Асқарбекова конвергентті редакцияның бір күнінен сыр шертетін сюжет дайындапты. Сондай-ақ, Жақсылық Қазымұратұлы қазіргі таңда интернет арқылы ақша табу жолдарын баяндады. Ал, магистрант Роза Аренова «Азаттық» радиосы және «Айналайын» жастар порталының күнделікті ел назарына ұсынатын жаңалықтарының мазмұнына назар аударып, тақырып бойынша слайд әзірледі.

«Ашық сабақ» қорытындысында, магистранттар сабақ барысында түсірілген фото және бейнеқұжаттарды әп-сәтте блогқа орналастырып, мәтін жазу арқылы әмбебап журналистің жан-жақты қырын танытқандай болды.

Аренова Роза,

                                                                 «Баспасөз және электронды БАҚ» кафедрасының 1-курс магистранты