Сеулде (Оңт.Корея) БҰҰ-ның академиялық ықпал бойынша екінші форумы өтті, онда өткен жылы атқарылған жұмыстар қорытындыланып, стратегиялық даму бойынша 2015 жылдан кейінгі күн тәртібіндегі мәселелер белгіленді. Бұл шараның маңыздылығы – БҰҰ Бас ассамблеясы бекітетін мыңжылдық тұрақты дамудың жаһандық стратегиясын қабылдауына дайындық жылы өтіп отырғандығында.
Шараға БҰҰ бас хатшысы Пан Ги Мун, ЮНЕСКО-ның бас директоры Ирина Бокова, бас хатшының арнайы хатшысы Джеффри Сакс, БҰҰ құрылымдық бөлімшелерінің жетекшілері, үкімет өкілдері, Нобель лауреаттары, халықаралық және үкіметтік емес ұйымдар басшылары, әлемнің жетекші ЖОО-ларының ректорлары қатысты.
Форумды Пан Ги Мун құттықтау сөзбен ашып, бүгінгі жаһандық сын-қатерлерге және адамзаттың өзекті мәселелерін шешуге бағытталған әлемдік қоғамдастықтың іс-әрекет бағдарламасын дайындау бойынша БҰҰ жұмысына тоқталды. Сонымен қатар ол БҰҰ жұмысына және мыңжылдықтың сын-қатерлерін шешуге зияткерлік үлес қосу мақсатындағы UNAI академиялық ұтқырлық хабтарының белсенді қызметін ерекше атап өтті. Осы тұрғыда ол тұрақты даму және жасыл экономика мәселелері бойынша мақсатты жұмыстың үлгісі ретіндегі тұрақты даму бойынша жаһандық хабын басқаратын әл-Фараби атындағы ҚазҰУ қызметіне жоғары баға берді.
Форумда ҚазҰУ ректоры академик Ғалым Мұтанов сөз сөйлеп, жиналған қауымды БҰҰ жаһандық хабы ретіндегі университет жұмысы мен өткізілген халықаралық шаралар қорытындысымен таныстырды. Ол UNAI ЖОО-ларын 2014 жылы III Азия университеттері форумында қабылданған «Университеттердің тұрақты дамуы бойынша үлгілік жоспарын» жүзеге асыруға және бүгінгі таңда ҚазҰУ жүргізіп жатқан «G-Global» виртуалды алаңындағы тұрақты даму мәселелері бойынша талқылауларға қатысуға шақырды.
Форум қатысушылары адамзаттың әлемдік мәселелерін шешу бойынша Қазақстанның ұсынған бастамаларына оң пікір білдірді, атап өтсек, жаһандық энергоэкологиялық қауіпсіздік стратегиясы, «Green bridge», «G-Global» және т.б. Форумда БҰҰ қоғамдық ақпарат департаментінің директоры және «Академиялық ықпал» бағдарламасының жетекшісі Раму Дамодаран: «Академиялық қауымдастық адамзаттың ең күрделі мәселелерін шешуге сүбелі үлес қоса отырып, тұрақты дамуға және бейбітшілікті сақтауға ықпал етеді. Әл-Фараби атындағы ҚазҰУ БҰҰ-ның тұрақты даму бойынша «Академиялық ықпал» бағдарламасының жаһандық хабы ретінде экологияны және қоршаған ортаны қорғауға белсене атсалысады, тұрақты даму идеяларын алға жылжыту жұмыстарын жүргізеді, энергияның альтернативті және жаңартылатын көздері бойынша зерттеу жүргізеді және жобалар дайындайды, – деп атап өтті.
Форумда әлемнің түкпір-түкпірінен келген делегаттар мыңжылдықтың даму мақсаттарын жүзеге асырудың жетістіктеріне сүйенетін және жер жүзінің жаһандық мәселелерін шешуге бағытталған 2015 жылдан кейінгі адамзат дамуының күн тәртібіндегі басты сұрақтарды талқылады. Сондай-ақ олар академиялық ықпал саласындағы ортақ тапсырмаларды шешуге және университеттер арасындағы жаһандық академиялық байланыстарды нығайтуға бағытталған 2015 жылдың «жол картасын» жасады.
ҚазҰУ-дың Баспасөз қызметі
